Қазақ – қашан да үлкенді сыйлаған, қариясын қадірлеген халық. Халқымыздың «Қарты бар үйдің – қазынасы бар» деген ұлағатты сөзі дәлелдегендей, 1 қазан – Қарттар күніне орай Астана қаласындағы №98 «Мирас» балабақшасында өткен салтанатты мереке жас ұрпақтың қарттарға деген құрметін тағы бір мәрте айшықтап берді.
«Қарттарын қадірлеген ел – қазыналы ел» атты тәрбиелік мәні зор іс-шараға балалардың ата-әжелері арнайы шақырылып, бүлдіршіндердің шынайы ықыласы мен ыстық ілтипатына бөленді. Мерекенің шымылдығы «Ынтымақ» тобының орындауындағы «Рух» әнімен ашылып, көрерменге көтеріңкі көңіл-күй сыйлады. Кішкентайлардың жүрекжарды үні зал ішін мейірім мен шаттыққа толтырып, алғашқы сәттен-ақ ерекше әсерге бөлеп жіберді.
Шараны ашқан балабақша меңгерушісі Несібелі Бахтигрейқызы Сарсенова ата-әжелерге деген ақжарма тілегін білдіріп, ұрпақ тәрбиесіндегі аға буынның рөліне тоқталып өтті.
– Сіздердің өмірлік тәжірибелеріңіз – біз үшін баға жетпес қазына. Ұрпақ тәрбиесі жолындағы ерен еңбектеріңізге бас иеміз! – деді ол.
Мерекелік бағдарлама барысында «Мұрагер» тобының бүлдіршіндері ата-әжелеріне деген сағынышы мен сүйіспеншілігін өлең жолдарымен жеткізді. Балалардың поэзия арқылы сыр шертуі көрермендердің көңілін босатып, мейірім мен махаббатқа толы әсер сыйлады. Ал «Миньондар» биін орындаған бүлдіршіндердің жарқын күлкісі мен қимылдары сахнаға шырай беріп, шараның сәнін аша түсті.
«Қанағат» тобының балғындары шырқаған әндер – ата-әжелерге арналған алғыс пен махаббаттың үніне айналды. Сонымен қатар, «Отан» әнін орындаған «Ынтымақ» тобының тәрбиеленушілері туған ел мен отбасыға деген перзенттік махаббаттарын әуелетті.
Іс-шараның ең әсерлі сәттерінің бірі – ата-әжелердің немерелерімен бірге «Қара жорға» биін билеген көрінісі болды. Бұл көрініс ұрпақтар сабақтастығын айқындап, ұлттық өнер мен дәстүрдің ұрпақтан-ұрпаққа жалғасып келе жатқанын паш етті.
Биылдан бастап елімізде Мемлекет басшысының тапсырмасына сай «Адал азамат» біртұтас тәрбие бағдарламасы жүзеге асырыла бастады. Яғни, ұлттық құндылықтарды ерте жастан сіңіруге ерекше назар аударылып отыр. Сонымен қатар, №98 «Мирас» балабақшасы үш жылдан бері «Абай аманаты» жобасы аясында да жүйелі жұмыс жүргізіп келеді. Бүлдіршіндер Абай Құнанбайұлының өлеңдерін жаттап, қара сөздерімен сусындауда.
Балабақша меңгерушісі Несібелі Бахтигрейқызы бұл жөнінде:
– «Адал азамат» біртұтас тәрбие бағдарламасының негізгі мақсаты – балаларды ұлттық құндылықтармен, қазақы болмыспен тәрбиелеу. Осы орайда біз балабақша қабырғасында «Аталар алқасы», «Әжелер алқасы», «Әкелер мектебі», «Аналар мектебі» сияқты қоғамдық құрылымдарды құруды қолға алдық. Бүгінгі келген ата-әжелердің белсенділігіне қарап, осы сәттен бастап «Аталар алқасы» мен «Әжелер алқасы» құрылды деп есептейміз. Бұл – ұрпақ тәрбиесіне барлығымыздың ортақ үлес қосуымыздың нақты көрінісі, – деп атап өтті.
Шара барысында аталған алқалардың жетекшілері таныстырылып, ата-әжелер бала тәрбиесіне белсенді араласуға, ертегі оқу, ұлттық салт-дәстүрлерді үйрету сияқты игі істерге атсалысуға шақырылды. Балабақша мен отбасы арасындағы алтын көпірді бекіте түскен бұл қадам қатысушылар тарапынан да қолдау тапты.
Мерекелік кеш соңында ата-әжелер ризашылықтарын білдіріп, алғысқа толы ақ тілектерін ақтарды.
– Әр үйдің еркесін тәрбиелеп отырған балабақша ұжымына шексіз ризамыз. Немерелерімізге тек білім емес, мейірім мен ұлттық тәрбие беріп жатырсыздар. Бұл – үлкен еңбек, – деп ағынан жарылды қариялар. Сонымен қатар, әжелер балаларға ертегі оқып беру, ұлттық тәрбие беру ісіне атсалысуға дайын екендіктерін жеткізді.
Осылайша, келген ақсақалдар мен ақ жаулықты аналар «Аталар» және «Әжелер» алқасының мүшелігіне қабылданып, тәрбиелік серіктестік жаңа деңгейге көтерілді. Солардың бірі – «Мұрагер» тобының тәрбиеленушісі Байбектің әжесі Райхан Асилова.
– Балабақша ұжымына, әсіресе тәрбиешілерден бастап басшыларына дейін зор алғысымды білдіремін. Немерем Байбек осы балабақшаға үш жылдан бері келіп жүр. Өзім немерелеріме жиі ертегі айтып, ауыз әдебиетімен сусындатып өсіруге тырысамын. Балабақшаға да жиі келіп тұрамын. Бүгіннен бастап «Әжелер клубының» мүшесімін. Сонымен қатар, Астана қаласындағы мектептерге де барып, оқушыларға ертегі айтып, ұлттық құндылықтарды насихаттап жүрмін, – дейді Райхан әже.
Балабақша ұйымдастырған игі шара – ұлт тәрбиесінің тамырын тереңнен тартқан тағылымды іс болды. Ұрпақ тәрбиесіне ұлт зиялылары мен отбасы өкілдерінің бірігіп үлес қосуы – ел ертеңінің жарқын болуына жасалған үлкен қадам.
Кәусар БАЙҒАЛИЕВА, Астана қаласы әкімдігінің «№98 «Мирас» балабақшасы» МКҚК қазақ тілі педагогі
