Несібелі Бахтигрейқызы Сарсенова, Астана қаласы әкімдігінің «№98 «Мирас» балабақшасы» МКҚК меңгерушісі
Қайырымдылық – бүгінгі қоғамның адамгершілік деңгейінің айнасы ғана емес, жас ұрпақтың бойына рухани байлық пен ізгілікті дарытатын үлкен тәрбие мектебі. Осы орайда Астана қаласындағы №98 «Мирас» балабақшасында өткен тағылымды іс-шара – жүрекке жылу сыйлаған, мейірім мен құрметке толы ерекше кездесу болды.
Игі шараға «Талап» коммерциялық емес акционерлік қоғамы Президентінің кеңесшісі, Астана қаласы бойынша бала құқығын қорғау жөніндегі уәкіл, Астана қаласының Құрметті азаматы, ҚР Парламенті Мәжілісінің бесінші шақырылымнан сайланған депутаты, Білім беру ісінің құрметті қызметкері Асима Бимендина қатысып, мұндай тәрбиелік мәні зор шаралардың ұрпақтар сабақтастығын нығайтып, жас буынға өнеге болатынын атап өтті.
Қайырымдылық айлығы аясында және «Адал азамат» біртұтас тәрбие бағдарламасы шеңберінде ұйымдастырылған шараға «Шарапат» әлеуметтік қызмет көрсету орталығының қариялары арнайы шақырылып, зор сый-құрмет көрсетілді.
Тағылымды кеш барысында балабақша қызметкерлері мен бүлдіршіндер арнайы концерттік бағдарлама ұсынып, өз өнерлерін шын жүректен тарту етті. Хор айтылып, оркестр ойнады, домбыраның қоңыр үнімен қазақтың халық әндері шырқалды. Ұлттық киіммен би билеген бүлдіршіндер сахнада ерекше көрініс сыйлап, жиналған қонақтардың жүзін жадыратты.
Балалардың балғын жүрегінен тараған мейірім мен шынайы ықылас – қарияларымыздың көңілінен анық байқалды. Бала бойындағы адамгершілік пен үлкенге деген құрметтің берік негізі қаланып жатқаны ерекше көрініс тапты.
Салтанатты кеш соңында ақ дастархан жайылып, қарияларға балабақша ұжымы бірлесіп әзірлеген дәм ұсынылды, осылайша, тәрбиенің өзегінде жатқан қонақжайлық пен құрметтің жарқын үлгісін көрсетті. Қарияларға деген құрметтің белгісі ретінде жылы күртешелер мен ұлттық оюлы тақиялар сыйға тартылды. Сыйлықтарды ата-әжелер риза көңілмен, жүрек жылуымен қабыл алып, балабақша ұжымына алғыстарын жаудырды.
«Шарапат» әлеуметтік қызмет көрсету орталығы – елордадағы қарттар мен мүмкіндігі шектеулі азаматтарға қызмет көрсететін маңызды мекеме. Орталықтың мәдени іс-шаралар ұйымдастырушысы Бақтыгүл Абдулованың айтуынша, бүгінде аталмыш орталықта 960-қа жуық адам қамтылған. Оның 690-ы – үй жағдайында күтім алатын қариялар, ал 342-сі – күндізгі стационарда тұрақты тұрып жатыр.
Бақтыгүл Өмірзаққызының мәліметінше, аптасына онға жуық адам орталықты паналауға келеді екен. Қайырымдылық айлығы басталғалы бері көптеген мекемелер, соның ішінде мектептер мен балабақшалар қарияларға арнап түрлі шаралар ұйымдастырып келеді.
Іс-шара барысында «Шарапат» орталығының тұрғындары өз өмір жолдары мен еңбек жылдары туралы естеліктерімен бөлісті. Солардың бірі – Бақытқали Хаметов. Қария орталықта тұрып жатқанына төрт айдан асқанын айтып өтті. Көкшетау облысы, Арқалық ауданында дүниеге келген ақсақал – Целиноград ауылшаруашылығы институтының түлегі. Өмірінің басым бөлігін ауыл шаруашылығы саласына арнаған ардагер жастарға жарқын өмір тіледі. Балалардың өнерін көріп, жүрегі елжіреген қария ұйымдастырушыларға алғысын білдірді.
№98 «Мирас» балабақшасында жүйелі түрде жүзеге асырылып жатқан «Адал азамат» біртұтас тәрбие бағдарламасы – жас ұрпақты отансүйгіштікке, адамгершілікке, ұлттық рух пен үлкенді сыйлауға баулитын тың бастама. Бағдарлама аясында теориялық біліммен қатар, практикалық іс-шараларға басымдық берілуде. Бұл –баланың өмірлік тәжірибесіне айналар, жүрекке ұялар тәрбиенің нақты жолы.
Осындай мазмұнды кездесулерді тұрақты түрде өткізу – біздің ұжымның басты мақсаттарының бірі. Өйткені ұлт болашағы – тәрбиелі ұрпақтың қолында. Ал тәрбиенің бастауы – үлкенді сыйлаудан, өткенді құрметтеуден басталады.
№98 «Мирас» балабақшасының ұжымы мен бүлдіршіндері ұйымдастырған тағылымды шара – ел болашағын тәрбиелеудегі өнегелі қадам. Жас буын мен аға ұрпақ арасындағы алтын көпір, рухани байланыстың үзілмейтін жібі.
«Адал азамат» бағдарламасы аясында өтіп жатқан осындай іс-шаралар арқылы ұлттық тәрбиенің тамыры тереңдеп, адамгершілік пен ізгілік ұрпақ бойына орнығады. Баланың жүрегіне егілген мейірім мен құрметтің дәні – ертеңгі күннің парасатты азаматы болып өсіп шығары сөзсіз.
«Қариясын қадірлеген ел – қазыналы ел». Біздің басты мақсатымыз – сол қазынаны бағалай білетін, үлкенге құрметпен қарайтын, жүрегінде адамгершілік оты маздаған ұрпақ тәрбиелеу.
