Береке бастауы – мейірімде

Күз – берекенің, молшылықтың, еңбектің жемісі мен ырыстың айы. Осы бір алтын күздің шырайын кіргізіп, үлкенге құрмет, кішіге ізет көрсетуді мақсат еткен тағылымды шара елордадағы №98 «Мирас» балабақшасында өтті.

Балабақша ауласында ұйымдастырылған күзгі жәрмеңкеге барлық топтардың ата-аналары мен педагогтері белсене қатысып, күздің мол өнімін ортаға салды. Түрлі жеміс-жидек пен көкөністер, қолдан жасалған бұйымдар мен дәмді тағамдар қойылған жәрмеңке аулаға ерекше мерекелік көңіл-күй сыйлады. Әр топ өздерінің ұйымшылдығы мен шығармашылығын танытып, күзгі молшылықтың сәнін келтірді.

Жәрмеңкенің тағы бір ерекшелігі – балабақша мамандары ұйымдастырған дәмхана болды. Мұнда келушілерге ұлттық тағамдардан манты, палау, кәуап, сондай-ақ шай мен кофе ұсынылды.

№98 «Мирас» балабақшасының меңгерушісі Несібелі Бахтигрейқызы Сарсенованың айтуынша, қайырымдылыққа негізделген күзгі жәрмеңке балабақшада өткен жылдан бері дәстүрлі түрде ұйымдастырылып келеді.

«Жәрмеңкені былтырдан бері дәстүрлі түрде өткізіп келеміз. Басты мақсатымыз – балаларға қайырымдылықтың, үлкенді сыйлаудың мәнін көрсету және ата-аналар мен педагогтерді ізгі іске біріктіру. Былтыр жәрмеңкеден түскен қаржыға балабақшамызға қарттарды арнайы шақырып, дастархан жайып, құрмет көрсеттік. Биыл да осы дәстүрді жалғастырып, жиналған қаражатты Қарттар күніне орай қайырымдылыққа бағыттауды жөн көрдік», – дейді меңгеруші.

Шын мәнінде, жәрмеңкенің мәні де осында – күздің молшылығын бөлісу ғана емес, адамның адамға деген мейірімін арттыру. Бірі өнімін әкелсе, бірі тағам әзірлеп, енді бірі жәрмеңкенің ұйымдастырылуына атсалысты. Осылайша ата-ана мен педагогтің бірлескен еңбегі игі іске ұласты.

Жәрмеңкеден түскен барлық қаражат 1 қазан – Қарттар күніне орай қайырымдылыққа бағытталды. Ал бүгін балабақша ұжымы осы бастаманың жалғасын тауып, Астана қаласындағы қарттар үйіне арнайы барды.

Ақ жаулықты әжелер мен ақ сақалды қарияларға сый-сияпат табысталып, балабақша ұжымы дайындаған концерттік бағдарлама ұсынылды. Әуезді ән мен әсерлі өнер қарттардың көңіліне қуаныш сыйлап, мерекелік көңіл-күй қалыптастырды.

Қарттарды құрметтеу – ұлттың тәрбиесі мен рухани құндылығының айқын көрінісі. Ал мұндай игі істерді балабақша қабырғасынан бастап қалыптастыру – өскелең ұрпақтың бойына ізгілік дәнін себудің жарқын үлгісі.

№98 «Мирас» балабақшасындағы күзгі жәрмеңке осылайша бір күндік мерекеден гөрі мағынасы терең, тағылымы мол шараға айналды. Күздің берекесі – дастарханға, дастарханның берекесі – қайырымдылыққа, ал қайырымдылық – қарттардың жүрегіндегі қуанышқа ұласты. Өйткені ізгілікке бастар жол үлкен істерден емес, осындай жүректен шыққан қарапайым қадамдардан басталады.

Өз тілшіміз