Баланың тілін, ойын, шығармашылық қабілетін дамыту – мектепке дейінгі тәрбиенің басты бағыттарының бірі. Сөз өнерін сүйген ұрпақ елін, тілін де құрметтейді. Осы мақсатта жас ұрпақтың бойында сөзге деген сүйіспеншілікті арттырып, көркем сөйлеу дағдыларын жетілдіру бағытында жыл сайын дәстүрлі түрде ұйымдастырылатын «Көркемсөз шебері» қалалық мәнерлеп оқу байқауы өз жалғасын табуда.
Аталған байқау Бибігүл Төлегенова атындағы «Creative» мектебінде өтті. Астана қаласындағы «№98 «Мирас» балабақшасынан осы байқауға қатысқан дарынды тәрбиеленуші – Қыдырәлі Айзере көркемсөз оқу шеберлігін ерекше байқатып, Абай Құнанбайұлының «Күз» өлеңін әсерлі, нақышына келтіріп орындады. Ақынның табиғат лирикасына толы шығармасын кішкентай бүлдіршіннің жүрекпен жеткізуі көрерменнің де, қазылар алқасының да ыстық ықыласына бөленді.
Байқаудың нәтижесінде Қыдырәлі Айзере өз дарыны мен талпынысының арқасында жүлделі орынды иеленіп, ұстаздары мен ата-анасының үмітін ақтады. Бұл жеңіс – баланың жеке еңбегінің, тәрбиешінің бағыт-бағдарының және балабақшадағы шығармашылық ортаның нәтижесі екені сөзсіз. Байқауға қатысу барысында балалар тек өлең жаттап қана қоймай, сахна мәдениетін, өз-өзін ұстау әдебін, тыңдаушыны құрметтеуді үйренеді. Мұндай іс-шаралар кішкентайлардың бойында сенімділік, табандылық, сөйлеу мәдениеті мен ұлттық әдебиетке сүйіспеншілік сияқты қасиеттерді дамытады.
№98 «Мирас» балабақшасында тіл дамыту және көркемсөзге баулу бағытындағы жұмыстар жүйелі түрде жүргізіледі. Балаларға қазақтың ұлы ақындарының шығармаларын таныстырып, олардың мәні мен мазмұнын ойын және бейнелеу арқылы жеткізу дәстүрге айналған. Қыдырәлі Айзеренің жетістігі – барлық тәрбиеленушілерге үлгі. Дарынды бүлдіршін өз өнерімен құрбыларына шабыт беріп, сөз өнерінің құдіретін кішкентай жүректерге жеткізді.
«Көркемсөз шебері» байқауы – баланың рухани әлемін байытып, сөз өнеріне деген сүйіспеншілігін арттыратын тағылымды шара. Осындай сайыстар арқылы жас ұрпақтың бойында әдебиет пен мәдениетке деген қызығушылық артып, олардың шығармашылық қабілеті шыңдала түседі.
Біздің балабақша ұжымы әр баланың бойындағы талантты дер кезінде байқап, оны дамытуға бағытталған осындай бастамаларды әрдайым қолдайды. Қыдырәлі Айзеренің жеңісі – «Мирас» балабақшасының ортақ қуанышы, еңбектің және тәрбиенің жемісі.
Ұлы Абайдың: «Өлең – сөздің патшасы, сөз сарасы» – деген өсиетін бойына сіңірген бүлдіршіндеріміздің биік белестерді бағындыра беруіне тілектеспіз!
Рахимкулова Айгерим Жаксылыковна, Астана қаласы әкімдігінің «№98 «Мирас» балабақшасы» МКҚК тәрбиешісі
Шораева Айжан Базарбековна, Астана қаласы әкімдігінің «№98 «Мирас» балабақшасы» МКҚК тәрбиешісі
