Күз – табиғаттың алтынға малынған әсем шағы ғана емес, берекенің, молшылықтың, мейірім мен ізгіліктің де мезгілі. Дән себіліп, тер төгілген еңбектің жемісін көріп, маусымның мәртебесін сезінетін жыл мезгілі. Астана қаласындағы №98 «Мирас» балабақшасында дәл осы күзгі молшылық пен мейірім рухын біріктірген тың форматтағы тәрбиелік іс-шара – «Күз – береке бастауы» атты мерекелік фестиваль тұңғыш рет ұйымдастырылып, көпшілік көңілінен шыққан мазмұнды мейрамға айналды.
Балабақша ауласында өткен мерекенің алғашқы сәті-ақ ерекше әсерге толы болды. Салтанатты шараның шымылдығын балабақша меңгерушісі Несібелі Бақтыгерейқызы Сарсенова ашып, жиналғандарға жүрекжарды құттықтауын арнады.
– Күз – табиғаттың ғана емес, адам баласының да ішкі әлеміндегі жылулық пен қайырымдылықты оятатын кезең. Биыл біз мерекені жаңа форматта – фестиваль түрінде ұйымдастырып отырмыз. Мерекелік шара балалардың шығармашылық қабілетін шыңдауға, ата-аналармен ынтымақтастықты арттыруға, ең бастысы, балаларды мейірімділік пен қамқорлыққа баулуға бағытталған. Балаларымыздың қуанышы – біздің ортақ қуанышымыз. Осындай игі дәстүр жалғасын тауып, жылдан жылға көркейе берсін, – деді ол.
Мерекелік концерт мазмұны жағынан да, көркемдік тұрғысынан да көрерменге зор әсер қалдырды. Балалар мен тәрбиешілердің бірлескен еңбегінен туған театрландырылған көріністер сахна төрінде көркем өрнек тапты. «Күн», «Жаңбыр», «Күз аруы» сынды табиғат бейнелерімен әсем безендірілген қойылым балғын көрермендердің де, ересектердің де көңілінен шықты.
Кішкентай бүлдіршіндер «Күз тамаша», «Тамшылар» секілді көңілді әндерді шырқап, алуан түрлі билермен сахнаның сәнін келтірді. Әсіресе, мектепалды даярлық топтарының жоғары деңгейдегі дайындығы мен сахналық мәдениеті ата-аналар тарапынан ыстық ықыласқа бөленді.
Фестивальдің ең жарқын беттерінің бірі – күзгі жәрмеңке болды. Әр топтың ата-аналары мен тәрбиешілері бірігіп, күзгі өнімдер мен қолдан жасалған тағамдарды, тәттілер мен ұлттық дәмдерді ұсынды. Күзгі өнімдерге толы жәрмеңке балабақша ауласын шағын көрмеге айналдырды.
Жәрмеңке жай ғана сауда емес, жүректен шыққан ізгі ниеттің көрінісі болды. Себебі барлық жиналған қаражат алдын ала хабарланғандай, қайырымдылыққа бағытталады. Балабақша ұжымы игі бастаманы Қайырымдылық айлығы аясында жүзеге асыруда. Атап айтқанда, жәрмеңкеден түскен қаражат Қарттар үйінде тұратын қарияларға арналады.
Жақында №98 «Мирас» балабақшасының ұжымы қамкөңіл қарияларды арнайы шақырып, шынайы құрмет көрсетуді жоспарлап отыр.Жәрмеңке барысында ата-аналардың белсенділігі ерекше байқалды. Әр топ өз киіз үйіндей безендірілген орталықтарын дайындап, қазақы болмыс пен заманауи идеяны ұштастырды. Қолдан жасалған бұйымдар, күзгі өнімдерден дайындалған тағамдар мен тәттілер көпшіліктің көңілінен шықты.
«Мұрагер» тобының ата-анасы Айдана Бекташева:
– Осындай мазмұнды шараны фестиваль ретінде ұйымдастырған балабақша ұжымына алғысымыз шексіз. Балаларымыз сахнада өнер көрсетіп қана қоймай, жақсылық жасауға, ізгілікке ұмтылуды үйреніп жатыр. Бұл – ең үлкен тәрбие. Жәрмеңкеден түскен қаражаттың қарттар үйіне жұмсалуы – шынайы қамқорлықтың белгісі, – деп алғысын білдірді.
Фестиваль барысында балалар табиғатпен тілдесіп, шығармашылықпен шұғылданды, ата-аналар ұйымшылдық танытып, ортақ іске жұмылды, тәрбиешілер кәсібилік пен жанашырлықтың үлгісін көрсетті, ал келушілер болашақ ұрпақтың жарқын келешегіне деген сеніммен тарқасты.
Алғаш рет өткізілгенімен, «Күз – береке бастауы» фестивалі мазмұны мен формасы жағынан жыл сайын дәстүрге айналуға әбден лайық. Өйткені, шаттық пен шапағат, өнер мен ізгілік тоғысқан шынайы мейрам болды. Балалар жүрегіне қуаныш ұялатқан әр сәт, ата-ананың ризашылығына бөленген әр көрініс – тәрбиенің үздік үлгісіне айналды.
Алтын күздің әр күні мейірім мен берекеге толы болғай!
Кәусар БАЙҒАЛИЕВА, Астана қаласы әкімдігінің «№98 «Мирас» балабақшасы» МКҚК қазақ тілі педагогі
